Chapter 1
Woh jagah jahan mohabbat na thi, usi mein uski zindagi guzri. Har chehra jo usne dekha, har muskaan jo mili, bas ek jhoot ka saaya lagti thi.ye kahani ek larki ki hai jo zindagi ke lagataar dhokhon, jhoot, aur be‑rahi mohabbat se andar se toot chuki hai. Har rishta, har muskaan usay thaka kar chhoda, aur woh har kisi se thak chuki hai. Jahan mohabbat na thi, wahan sirf tanhaai aur dard ka raaj tha. Kahani uske safar ko dikhati hai—kaise woh apne andar ke andheron se guzarti hai, apne aap se ladti hai, aur shayad ek din khud ko samajhne aur maaf karne ka rasta dhund leti hai.
Is kahani ki shuruaat us din se hoti hai jis din wo aik masoom aur nadan larki is duniya mein aayi. Us ka naam main nahi lena chahti. Bohat khoobsurat aur masoom larki thi wo bachpan mein. Itni khoobsurat thi ke jab bhi koi dekhta to use uthane ki kwahish karta, lekin us ki ye khoobsurati sirf kuch saalon ke liye hi thi.
Aista aista waqt badalta gaya aur wo larki bari hoti gayi. Ab wo 7 saal ki ho gayi thi. Us ne apni khelne ki umar mein bohat si takleefein bardasht ki. Us ne apni wo saari umar ghar ke jhagrhon mein guzaari. Wo roti, chillati, wo ye sab nahi dekh pati thi. Wo aik kone mein baith kar ye sab dekh kar roti thi, apne Rab se dua karti thi ke sab theek ho jaye.
Waqt badalta gaya aur ye sab chalta gaya. Ab wo 12 saal ki ho gayi thi. Ab ye sab dekh dekh kar use ab in sab cheezon ki aadat si ho gayi thi. Ab agar ghar mein koi larai hoti to khamoshi se dekhti, lekin kuch bolti nahi. Bas aik toote huay dil ke saath wo sab dekhti rehti.
Ab wo apna sukoon bahar logon mein talash karti thi, apni doston mein, apni cousins mein. Wo sab us ki maa ke baare mein us ke munh par bohat bura bolte, lekin wo is dar se khamosh rehti ke kahin us ki dosti ya ye rishta toot na jaye, to wo ye sab bardasht karti.
Waqt badalta gaya aur wo 13 saal ki ho chuki thi. Ab us ke ghar ke maslay kaafi had tak theek ho chuke thay, lekin abhi bhi sab theek nahi hua tha. Ab wo sab us ke saath achay ho gaye thay jo us ke munh par use bura bola karte thay.
Q achay huay thay?
Q ke wo jante thay ke ab ye bari ho gayi hai, ab ye har baat apne ghar walon ko bataye gi.
Lekin phir us ki zindagi mein aik aur safr shuru hua, jo us ki zindagi mein us ke liye pehli dafa koi khushi ka raaz bana. Lekin use ye maloom nahi tha ke us ki ye khushi bhi us se chheen li jaye gi.
To ab ye naya safar tab ka tha jab wo 13 saal ki hi thi. Wo chhat par jati thi sukoon aur khamoshi ke liye. Akele tehalti rehti thi. Aik din us ki nazar us ke ghar ke samne aik larke par pari jo apne kaam mein masroof tha. Us larki ne use dekha aur dekhti reh gayi. Larke ne bhi use dekha lekin phir nazar andaaz kar diya.
Ab wo use dekhne ke liye rozana chhat par aati — subah, shaam, raat, har waqt. Ab us larke ko bhi shak parhne laga us par, lekin wo na kuch pooch saka aur na hi wo larki kuch bol saki, q ke ghar to nazdeek thay lekin beech mein saara zamana tha.
Isi dauran us ki aik dost bani, jis ke saath us ki bohat gehri dosti ho gayi. Us ka naam main nahi le sakti. Wo larki apni har baat apni us dost se karti thi, har aik baat. To aik din us larki ne us larke ki baat apni us dost ko bata di.
Ab us ke batane ki dair thi ke us ki dost ne aik dam se kaha:
“Yaar, main to isay janti hoon...”
