KAMBAL ASAWA

May mga taong ipinanganak na magkapareho ang mukha, ngunit magkaiba ang kapalaran.

Sa isang liblib na baryo sa pinakamalayong sulok ng Pilipinas, isinilang ang kambal na sina Aaron at Aeron. Mula pagkabata, tila salamin sila ng isa't isa. Parehong anyo, parehong tindig, parehong ngiti, at maging ang kanilang ugali ay halos walang pinagkaiba. Kung minsan, maging ang sarili nilang mga magulang ay nalilito kung sino ang kaharap nila.

Ngunit sa likod ng kanilang pagkakapareho ay nakatago ang isang katotohanang hindi kayang makita ng mga mata, magkaiba ang landas na nakatakda para sa kanila.

Lumaki silang kapos sa buhay ngunit sagana sa pangarap. Ang kanilang mga magulang ay simpleng magsasaka lamang na buong buhay na nagsumikap upang mabigyan ng magandang kinabukasan ang kanilang mga anak. Sa bawat pagsikat ng araw ay kasabay nilang pinapasan ang bigat ng kahirapan at sa bawat paglubog naman nito ay dala nila ang pag-asang balang araw ay magbabago rin ang kanilang kapalaran.

Ngunit hindi lahat ng pangarap ay kayang abutin ng dalawang kamay.

Dumating ang panahong kinailangan nilang harapin ang pinakamahirap na desisyon ng kanilang buhay. Hindi sapat ang kanilang kinikita upang pag-aralin ang dalawang anak nang sabay. Isa lamang ang kayang suportahan.

Isa lamang ang maaaring mangarap. Isa lamang ang maaaring lumipad At sa araw na iyon, pinili ni Aaron na maging pakpak ng kanyang kapatid.

Pinili niyang isantabi ang sarili niyang pangarap upang maipagpatuloy ni Aeron ang pag-aaral sa Maynila.

"Kapag nakatapos ka, parang nakatapos na rin ako." iyon ang mga salitang binitawan niya habang pinagmamasdan ang kapatid na papalayo sakay ng lumang bus na magdadala rito sa siyudad.

Hindi niya alam na iyon din ang araw na magsisimulang mabago ang lahat.

Sa una, naging maayos ang buhay ni Aeron sa Maynila. Nag-aral siya nang mabuti at pinanghawakan ang pangakong ibabalik niya sa kanyang pamilya ang lahat ng kanilang sakripisyo.

Ngunit ang siyudad ay may kakaibang kapangyarihan. Marunong itong mang-akit. Marunong itong manlinlang at higit sa lahat, marunong itong sumira ng pangarap.

Unti-unting nalayo si Aeron sa landas na kanyang tinatahak. Napalitan ng bisyo ang mga libro. Napalitan ng maling barkada ang mga pangarap at napalitan ng mga pangakong walang kasiguraduhan ang kanyang mga plano para sa hinaharap.

Hanggang sa dumating ang araw na ang mga bulong ng tsismis ay naging mga balitang umabot pabalik sa kanilang probinsya.

Nakarating ang lahat sa kanilang mga magulang. Ang mga gabing walang tulog. Ang mga problemang hindi nila kayang takasan. Ang mga luha at pagkadismayang pilit nilang itinago.

Lahat ng iyon ay naging unos na unti-unting sumira sa kanilang tahanan at habang si Aeron ay nalulunod sa magulong buhay sa Maynila, si Aaron naman ay naiwan sa probinsya upang buhatin ang pamilyang unti-unti nang gumuho.

Ngunit sa gitna ng lahat ng paghihirap ay may isang taong dumating sa kanyang buhay.

Isang taong nagpangiti sa kanya. Isang taong nagturo sa kanya kung paano muling mangarap at isang taong minahal niya nang higit sa sarili.

Si Luffi.

Sa isang lugar na hindi sanay tumanggap ng pagmamahalang katulad ng sa kanila, natutunan nilang itago ang nararamdaman. Sa bawat lihim na tingin, sa bawat tahimik na pagngiti, at sa bawat sandaling sila lamang ang magkasama, mas lalo lamang lumalalim ang kanilang pagmamahalan.

Ngunit ang mga lihim ay may sariling paraan upang mabunyag at ang tadhana ay may sariling paraan upang guluhin ang lahat.

Nang tuluyan nang mapauwi ni Aaron si Aeron mula sa Maynila, inakala niyang matatapos na ang kanilang mga problema.

Nagkamali siya. Sapagkat ang pagbabalik ni Aeron ay hindi katapusan.

Ito ang simula. Simula ng mga lihim. Simula ng mga pagkakamali. Simula ng mga damdaming hindi nila inaasahang haharapin.

Dahil sa kanilang halos perpektong pagkakahawig, nagsimulang mabalot ng kalituhan ang mga taong nasa paligid nila.

Isang pagkakamaling tingin. Isang maling akala at isang katotohanang maaaring sumira sa lahat ng kanilang pinanghahawakan.

Habang lumilipas ang mga araw, lalong nagiging masalimuot ang ugnayan nilang tatlo.

May mga bagay na dapat malaman. May mga lihim na dapat manatiling nakatago at may mga katotohanang kapag nalaman ay maaaring tuluyang magwasak sa kanilang samahan ngunit hindi lamang pag-ibig ang susubok sa kanila.

Kasabay ng pagkawala ng kanilang mga magulang ay muli na namang haharap ang kambal sa isang desisyong babago sa kanilang buhay.

Muling babalik sa Maynila si Aeron at sa pagkakataong ito, hindi siya mag-iisa. Kasama niya si Aaron. Kasama nila si Luffi.

Tatlong pusong may kanya-kanyang sugat. Tatlong taong may kanya-kanyang lihim. Tatlong buhay na unti-unting pagdurugtungin ng tadhana.

Sa ilalim ng iisang bubong, matutuklasan nila na hindi lahat ng pagkakapareho ay biyaya. Minsan, ito rin ang dahilan ng kapahamakan.

Dahil sa mundong puno ng tukso, kasinungalingan, at pag-ibig, sapat na ba ang dugo upang manatiling buo ang isang pamilya O darating ang araw na ang mga lihim na matagal nilang itinago ang siyang sisira sa lahat?

Dalawang kambal.

Isang pagmamahalan.

At isang tadhanang hindi kailanman naging patas.

Ito ang kwento nina Aaron at Aeron.

Ang kwento ng dalawang mukhang magkapareho, ngunit may mga pusong unti-unting dadalhin sa magkaibang direksyon. At ito rin ang kwento ng mga lihim na minsang itinago sa dilim, mga lihim na balang araw ay hihingi ng kapalit.

Dahil sa bawat maling pagkakakilanlan. May isang pusong masasaktan at may isang katotohanang mabubunyag.

At may isang buhay na tuluyang magbabago magpakailanman.