Galat Aur Bahut Galat Ke Darmiyan Part 1 by Sakina at Inkitt

Chapter 1 Ghalat Aur Bohat Ghalat Ke Darmiyan

Ghalat Aur Bohat Ghalat Ke Darmiyan

Har zindagi ki shuruaat ek jaisi nahi hoti.

Kuch bachay duniya mein aankhen kholte hi mohabbat, sukoon aur apnapan dekhte hain… aur kuch bachon ki aankhen khulne se pehle hi zindagi unke liye apne faisle kar chuki hoti hai.

Meri kahani bhi ek aise hi ghar se shuru hoti hai.

Ek bara shehar, ek choti si pyari jagah… aur ek aisa ghar jahan hum das behen-bhai rehte thay.

Humein lagta tha hum ek aam si family hain.

Lekin hum nahi jaante thay ke hamare ghar ki deewaron ne woh sab kuch dekha tha, jo hum bachay kabhi kisi ko bata nahi sake.

Aur shayad meri zindagi ka sab se pehla sawal bhi wahi tha—

Jab insaan ke saamne sahi aur ghalat mein se chunne ka mauqa hi na ho, to woh kya kare?

Ya phir…

jab sirf ghalat aur bohat ghalat ke darmiyan se ek raasta chun’na pare?

Humne bachpan se hi dekha tha ke mere Baba bohat sakht mizaj thay.

Main teesre number ki aulaad thi. Mujh se do baray behen-bhai thay—meri bari Bhaji aur mera bara Bhai. Unke baad main thi.

Baba ko hum hamesha se hi sakht kehte thay. Unki sakhti sirf daant tak mehdoood nahi thi; unke saamne hum bachay har waqt dare dare rehte thay.

Meri Ammi bohat decent aur darpok mizaj ki aurat thin. Haan, sunne mein thora ajeeb lagta hai, lekin yeh haqeeqat thi. Ammi ka khandan bhi bohat shareef aur suljha hua tha. Larai-jhagre aur aisi cheezon se woh log bohat door thay.

Lekin mere Baba ka maazi kuch aur hi tha.

Baba siyasat mein rehte thay, aur siyasat ki duniya mein unhon ne kuch bohat khatarnaak cheezen bhi dekhi aur jheli thin. Shayad unki sakhti aur gusse ke peeche unki wohi zindagi thi.

Isi tarah unki shaadi Ammi se ho gayi, aur phir hum bachay duniya mein aaye.

Ammi aksar batati thin ke shaadi ke baad Baba ne unhein bahar jaane ki zyada ijazat nahi di. Woh zyada tar ghar mein hi rehti thin.

Ammi bohat khoobsurat thin. Aur mere liye to woh duniya ki sab se pyari aur khoobsurat aurat thin.

Baba bhi apni jagah achay thay. Main aaj bhi yahi kahungi ke mere Baba pyare thay—bas unki sakhti bohat zyada thi.

Hamari Dadiyal ki taraf ka mahaul bhi hamare liye aasaan nahi tha. Wahan larkiyon ko pasand nahi kiya jata tha. Shayad isi wajah se meri Dadi kabhi hamare saath rehne nahi aayin.

Phir ek raat aisa waqia hua jo aaj tak mere zehan se nahi nikla.

Us raat hamara Dadiyal ghar aaya hua tha. Hum us waqt bohat chotay thay. Mere Dada, Dadi aur shayad Taya bhi aaye hue thay. Sab log baith kar baatein kar rahe thay. Humein yaad nahi ke woh kis cheez par baat kar rahe thay—shayad zameenon aur gandum waghera ki baatein ho rahi thin.

Ammi sab ke liye khana bana rahi thin.

Isi dauran Baba ne Ammi se kaha ke unke liye ek glass pani le aao.

Ammi foran steel ke glass mein pani le aayin. Hamare ghar mein steel ke glass mein pani peena aam baat thi, balki hum isi ko zyada pasand karte thay. Aur kyunki Dadiyal gaon se aaya hua tha, Ammi ne shayad yahi socha ke steel ke glass mein pani de deti hoon.

Lekin Baba ko yeh baat bilkul pasand nahi aayi.

Unhon ne gusse mein kaha, “Tum mere saamne mere baap ko steel ke glass mein pani de rahi ho?”

Ammi ne foran samjhane ki koshish ki.

“Meray kehne ka woh matlab nahi tha. Main to bas yeh soch rahi thi ke shayad gaon se aaye hain, is liye steel ke glass mein pani pee lenge.”

Mere Dada ne foran baat sambhalne ki koshish ki.

Unhon ne kaha, “Theek hai, koi baat nahi. Main steel ke glass mein pani pee lunga.”

Aur Dada ne waqai usi steel ke glass mein pani pee liya.

Lekin meri Dadi baar baar Baba ko tok rahi thin ke, “Tumhari biwi ko itna bhi nahi pata ke kis tarah pani dena chahiye aur kis tarah nahi?”

Dada ne phir kaha, “Is baat ko jaane do. Khatam karo yeh baat aur aage barho.”

Baat wahin khatam hoti hui nazar aayi.

Ammi dobara khana banane mein lag gayin.

Jab khana tayyar hua aur Ammi ne table par khana lagaya, to is baar woh sheeshe ka glass le kar aayin. Us mein pani bhara aur sab ke liye khana rakh diya.

Us waqt zameenon ki baat ho rahi thi. Baba Dadi se kisi zameen ke baare mein baat kar rahe thay.

Ammi ne sirf itna kaha, “Aapki bhi koi zameen hai?”

Bas.

Itni si baat par meri Dadi bharrak uthin.

Unhon ne kaha, “Tum kya chahti ho? Tumhein kya lagta hai hum tumhare shohar ki zameen kha rahe hain? Yeh woh…”

Phir unhon ne kaha, “Tumhara shohar nahi, mera beta hai.”

Ammi ne dobara samjhane ki koshish ki.

“Ammi, mera woh matlab nahi tha…”

Lekin is baar baat aur bigar gayi.

Baba ne table par rakha hua sheeshe ka glass uthaya…

Aur Ammi ke sar par de maara.

Main wahin khari thi.

Maine apni aankhon ke saamne woh manzar dekha.

Baba gusse mein keh rahe thay, “Tum meri maa ke saath behas kar rahi ho?”

Sheeshe ka glass lagte hi Ammi ka sar phat gaya.

Unke sar se khoon behne laga.

Aur main…

Main bas dekhti reh gayi.

Us din mere dil aur zehan mein Baba ke liye ek aisa darr baith gaya jo phir bohat arsay tak mere andar raha.

Main unse itni dar gayi thi ke jaise unke saamne meri saans bhi ruk jaati thi.

Meri bari behen bhi wahin thi. Mera bara Bhai bhi tha.

Hum teeno bachay khamoshi se woh sab dekhte rahe.

Kisi mein himmat nahi thi ke kuch kahe.

Phir Ammi apna zakhmi sar sambhalte hue kamre mein aa kar baith gayin.

Woh bohat ro rahi thin.

Unke sar se khoon beh raha tha. Unka chehra, jo hamesha bohat pyara aur saaf tha, khoon se bhar gaya tha.

Unhein us haal mein dekh kar hum aur bhi zyada darr gaye.

Us din ke baad Baba ka darr hamare andar aur gehra hota chala gaya.

Baba humein bohat daantte thay.

Hum ghar mein unke saamne sehmay sehmay rehte.

Lekin jab Baba ghar se bahar chale jaate, to jaise ghar ki hawa hi badal jaati.

Hum bachay phir khul kar hansne lagte, baatein karte aur thora sa khush ho lete.

Us raat bhi Ammi ke zakhm ki patti ki gayi. Humne unki madad ki.

Baba ne Ammi se kaha, “Aage se mere saath is tarah behas mat kiya karo. Tumhein pata hai main kitna gusse wala hoon.”

Ammi chup ho gayin.

Unhon ne koi jawab nahi diya.

Bas khamoshi se apne ghar ke kaamon mein dobara lag gayin.

Aur un dino…

Ammi hamila bhi thin.

Mere se chhota ek aur bhai duniya mein aane wala tha.

Us waqt Ammi hamila thin aur unka saatwan mahina chal raha tha. Ek din hamare ghar Dadi aur Dada aaye hue thay. Ammi ko achanak bohat zyada dard mehsoos hone laga.

Ammi ne Dadi se kaha, “Ammi, mujhe bohat dard ho raha hai.”

Dadi ne unki baat ko sanjeedgi se nahi liya.

Unhon ne kaha, “Aisi kya baat hai? Tum duniya mein pehli aurat nahi ho jo bachay paida kar rahi hai. Hum to aise hi jaate thay aur bachay paida karke aa jaate thay. Tumhare nakhre hi khatam nahi hote.”

Ammi ne kaha, “Lekin mujhe waqai bohat dard ho raha hai. Abhi to mera saatwan mahina hai. Mere poore mahine bhi nahi hue. Meri delivery kaise ho sakti hai?”

Dadi ne kaha, “Bas, tumne mere bete ko tang kiya hua hai. Saatwein mahine mein kaun se delivery ke dard lagte hain? Phir jhoot kyun bol rahi ho?”

Ammi ne kaha, “Main jhoot nahi bol rahi. Mujhe sach mein dard ho raha hai.”

Us din ghar mein washing machine bhi aayi hui thi. Dadi ne Ammi se kaha ke jao aur apne kapray dho.

Ammi chup chaap kaam karne chali gayin.

Lekin kaam karte karte unka dard itna barh gaya ke woh sambhal bhi nahi pa rahi thin.

Aakhir Dadi ne kaha, “Chalo, main check kar hi leti hoon.”

Dadi gaon mein normal deliveries karwane wali dai bhi reh chuki thin. Woh Ammi ko kamre mein le gayin aur check kiya.

Aur phir…

Mera bhai ghar par hi paida ho gaya.

Woh itna kamzor tha ke usay dekh kar lagta tha jaise haddiyon par sirf jild charhi hui ho. Woh bohat zyada kamzor aur nazuk tha.

Lekin phir bhi Dadi ne yeh nahi maana ke humein waqt par hospital jana chahiye tha.

Ulta Ammi se machine par kapray dhulwaye gaye.

Mere Dada ne jab mere bhai ko uthaya to Ammi ko tasalli dete hue kaha, “Tension nahi lo. Jab yeh doodh piyega na, to khud hi healthy ho jayega. Aur dekho, ghar par hi delivery ho gayi. Hospital ka kharcha bhi bach gaya.”

Us waqt Baba bhi ghar aaye aur unhon ne dekha ke delivery ho chuki hai.

Unhon ne bhi bas itna kaha, “Achha, delivery ho gayi. Koi baat nahi.”

Is tarah mera chhota bhai hamare ghar mein aaya.

Woh hamare ghar ka chautha bachcha aur mera doosra bhai tha.

Lekin meri Ammi ki mushkilein khatam nahi hui thin.

Kuch arsay baad Ammi dobara hamila ho gayin.

Ghar mein pehle ki tarah Baba aur Ammi ke darmiyan larai-jhagre hote rehte thay. Ammi hamal ki haalat mein thin, ghar ke kaam karti thin aur bachon ki zimmedari bhi sambhalti thin.

Isi dauran hamare ghar mein paanchwan bachcha aaya.

Mera chhota bhai.

Lekin woh normal nahi tha.

Woh abnormal paida hua.

Ammi usay dekh kar bohat royin.

Lekin us bachay ke duniya mein aane se pehle hi hamari zindagi mein ek aisa mod aa chuka tha jis ne hamari poori kahani badal di.

Hamare Dada aur Dadi wapas ja chuke thay.

Ammi dobara hamila thin.

Ek din hamari Khala hamare ghar rehne aayi hui thin.

Us raat jo kuch hua, us ne Ammi aur Baba ke rishte ko bilkul hila kar rakh diya.

Ammi ka kehna tha ke Baba ne meri Khala ke saath raat guzari aur Ammi ko behosh karne wali dawa de di gayi thi.

Jab Ammi ko is baat ka pata chala, to unki aur Baba ki bohat sakht larai hui.

Larai itni barh gayi ke Ammi ne Quran Pak utha liya.

Aur gusse aur dard mein Ammi ne Baba ko baddua de di.

Unhon ne kaha ke tum apni aulaad ki takleefein dekhoge. Tumhari aulaad dukh aur museebaton mein rahegi.

Us waqt hum bachay bohat chotay thay.

Humein nahi pata tha ke asal mein hua kya tha.

Lekin jab baad mein mera chhota bhai abnormal paida hua, to hamare bachpan ke zehan mein ek khauf baith gaya—

Kya badduaen waqai asar karti hain?

Us waqt humein yeh nahi samajh aata tha ke hamare ghar mein itni museebatein kyun aa rahi hain.

Lekin ek baat humne apni aankhon se dekhi thi:

Quran Pak uthne wale us waqia ke baad hamare ghar ke halaat aur bhi kharab hote chale gaye.

Laraiyan, gussa, khauf aur pareshani…

Sab kuch jaise hamari zindagi ka hissa ban gaya tha.

Aur main?

Main dheere dheere andar se bilkul khamosh hoti gayi.

Main kisi se kuch nahi kehti thi.

Na apna darr batati thi, na apni pareshani.

Bas chup rehti thi.

Hamara bachpan isi tarah guzar raha tha.

Baba aksar raat der se ghar aate thay.

Ammi subah bohat jaldi uthti thin, kyunki hum bachon ko school bhejna hota tha. Din bhar ghar ke kaam karti thin. Kabhi ek bachcha unki god mein hota, kabhi woh hamal ki haalat mein hoti thin.

Us waqt jo mera abnormal bhai tha, woh bhi Ammi ki god mein hota aur doodh peeta tha.

Ammi itni thak jaati thin ke kabhi kabhi unki aankh lag jaati.

Ek raat bhi aisa hi hua.

Baba der raat ghar aaye aur darwaza bajaya.

Lekin Ammi gehri neend mein thin.

Darwaza kholne mein sirf pandrah minute ki der hui.

Lekin un pandrah minute ne us raat hamari zindagi ka sab se darauna manzar dikha diya.

Darwaza khula to ghar mein achanak shor hone laga.

Main us waqt so rahi thi.

Jis kamre mein main, Ammi aur meri bari behen soti thin, wahan achanak bhaag daur ki awaazein aayin.

Meri aankh khuli to maine dekha ke Ammi aur meri bari behen bhaagti hui kamre ki taraf aa rahi thin.

Dono ne foran kamre ka darwaza band kar diya.